રાજ્યમાં એપ્રિલ મહિનામાં માવઠાનો માર સહન કરવો પડ્યો હતો. જ્યારે મે મહિનામાં ગરમી પોતાના તેવર બતાવી રહી છે. સમગ્ર રાજ્યમાં તાપમાનનો પારો ઊંચકાયો છે. હવામાન વિભાગે આપેલી માહિતી પ્રમાણે, બુધવારે વલ્લભવિદ્યાનગર 44.1 ડીગ્રી તાપમાન સાથે રાજ્યનું સૌથી ગરમ શહેર રહ્યું હતું. જ્યારે સાતથી વધારે શહેરોમાં ગરમીનો પારો 43 ડીગ્રીને પાર થયો હતો. તો બીજી બાજુ હવામાન વિભાગે આગાહી કરતા જણાવ્યું છે કે, તાપમાન વધ્યુ છે. હવે આગામી 5 દિવસ તાપમાનમાં કોઈ મોટા ફેરફારની શક્યતાઓ નહીવત છે. જોકે, આગામી બે દિવસમાં તાપમાનમાં એકાદ ડિગ્રીનો વધારો થઈ શકે છે. રાજ્યના બે જિલ્લા માટે હીટવેવની આગાહી કરવામાં આવી છે. કચ્છ અને પોરબંદરમાં 45 ડિગ્રીને પાર જઈ શકે છે.
હવામાન વિભાગની આગાહી પ્રમાણે આગામી દિવસોમાં ગરમીમાં કોઇ રાહત થવાના એંધાણ જોવા નહીવત છે. મે મહિનાની પ્રથમ સપ્તાહ બાદ રાજ્યમાં હવે ગરમીનો પારો સતત ઉંચક્યો છે.
અમદાવાદના હવામાન વિભાગના ડાયરેક્ટર ડૉ. મનોરમા મોહંતીએ જણાવ્યું કે, સૌરાષ્ટ્ર-કચ્છ અને ગુજરાતના અન્ય ભાગોમાં આગામી પાંચ દિવસ સુધી વરસાદ રહેવાની સંભાવના નથી. મોટાભાગે રાજ્યનું હવામાન સૂકું રહેવાની શક્યતાઓ છે. રાજ્યમાં ગરમીનો પારો હાલ જે સ્થિતિમાં છે તે સ્થિતિમાં રહેશે. ઉપરાંત તેમણે જણાવ્યું છે કે, તાપમાનનો પારો ઉંચકાયો છે. ત્યારે આગામી પાંચ દિવસ તાપમાનમાં કોઈ મોટા ફેરફારની શક્યતા નહીવત છે. જોકે, આગામી બે દિવસમાં તાપમાનમાં એકાદ ડિગ્રીનો વધારો થઈ શકે છે.
અમદાવાદ, પાટણ, મહેસાણા, ખેડા,સાબરકાંઠા, અરવલ્લી, ગાંધીનગર, સુરેન્દ્રનગર, બનાસકાંઠા, રાજકોટ, અમરેલી અને કચ્છમાં તાપમાન 42-44 ડિગ્રી રહેવાની શક્યતા છે. જ્યારે ઉત્તર પશ્ચિમના પવનો ફૂંકાતા ઉત્તર ગુજરાત તથા સૌરાષ્ટ્ર-કચ્છમાં ગરમીનું જોર વધવાની શક્યતાઓ વ્યક્ત કરવામાં આવી છે.
આ સાથે શરીરમાં પાણી ઘટીને ડિહાઈડ્રેશનની સ્થિતિ ઉભી ના થાય તે માટે પાણી-છાશ સહિતના લીકવિડ લેવાની સલાહ હવામાન વિભાગે આપી છે. આ સાથે ગરમીમાં સુતરાઉના હળવા રંગના કપડા પહેરવાની પણ સલાહ આપવામાં આવી રહી છે.
